ဆရာတာရာမင်းဝေရဲ့ ကဗျာပါ

ချစ်ခြင်းမေတ္တာဟာ
မှော်ဆရာတစ်ယောက်ရဲ့ နိဂုံးလို


အခုလို . . .
လှပအေးစက်နေတဲ့ညမှာပဲ
ငါ . . . ပျိုးထားတဲ့ မြနှင်းဆီဟာ
ကြယ်တစ်ရာ ခြံရံပြီး ကြွေကျသွားခဲ့တယ်။

တိမ်လွှာမျဉ်းကောတ်တွေကလည်း
ချစ်သူတစ်ယောက်ရဲ့ မီးအိပ်မက်မှာ
ရွှေမျက်ရည်တွေ စိုလက်လာပြီလို့
မှိုင်းညို့နေတဲ့ ကောင်းကင်ကြီးကို
တီးတိုး ပြောကြားလိုက်တယ်။

ချစ်ခြင်းမေတ္တာဟာ
မှော်ဆရာတစ်ယောက်ရဲ့ နိဂုံးလို
နောက်ဆုံးမှာ
မီးခိုးလုံးများ ဖြစ်သွားရော့မလား . . . လို့
နှုတ်ခမ်းကိုက်ပြီး . . . ငါ စဉ်းစားဖူးတယ်။

လူငယ်တစ်ယောက်ကို ပြုစားဖို့
အဘယ်ဘုရားထံ
နင့်လက်တွေ ဖြန့်ကား တောင်းခံခဲ့သလဲ . . .
ငါ့ရာဇ၀င်ခပ်ကျဲကျဲကို
ငရဲမီးထဲ တွန်းချလိုက်တယ်။

လောကဓံဦးတုန်းက
အလွန်အကြူးသောက်ခဲ့တဲ့ . . . အရက်တစ်ခွက်
ခုမှ . . . စံပယ်ရွက်တွေပေါ် မူးလဲ
အသည်းကွဲတယ် . . . ဆိုတာ
သီချင်းလေးတွေ တိုးတိုးညည်းရင်းက
ထိရှခဲ့တဲ့ . . . သွေးမဲ့ဒဏ်ရာတစ်ချက်ပါ။

သိုးကျောင်းသားရဲ့ ခံနိုင်ရည်နဲ့
နတ်ဘီလူးတွေရဲ့ သတိရခြင်းမျိုးက
ငါ့ကို စိုးမိုးထားတယ်။

စက်ရုပ်ကို ဒူးထောက်ကျစေတဲ့
နင့်ရဲ့ . . . မျက်ဝန်းစိမ်းတွေထဲမှာ
ငါ . . . ဘယ်လိုမှ မေ့လို့မရတဲ့
မဟာလင်္ကာ တစ်ပိုင်းတစ်စ . . . ရှိနေလေရဲ့ . . . ။

အဲဒီလိုနဲ့ပဲ
ငါ . . . ပြန်လည်ချည်နှောင်ခဲ့ပါ့မယ် . . .
ချစ်သော . . . ဖဲကြိုးဝါလေးရယ် . . .
. . . . . . . . . . . . . . .
. . . . . . . . . . . . . . . ။
အရှေ့လေတွေ တိုက်တုန်းက
ခါးကုန်းနေတဲ့ ငါတို့ရဲ့မြရာပင်အိုကြီးဟာ
တုန်ရင်ချည့်နဲ့စွာ ယိမ်းထိုးနေတော့တယ် . . . ။

ကျောင်းတော်ရဲ့စည်းအပြင်
နှောင်းရိပ်တွေ တလွင်လွင်နဲ့
ထင်ယောင်ထင်မှား
လမ်းပေါ်မှာ ငါစဉ်းစားတာ . . .
နင့်အကြောင်း . . . ခေါင်းစဉ်များစွာပါပဲ ။

ထိပ်ထားရယ် . . .
အီဂျစ်ပြက္ခဒိန်ထဲက
မိုးတိမ်တွေ ရွာမယ့်နေ့
နင်နဲ့ငါ . . . ပြန်ဆုံတွေ့ကြရင် . . .
ဒီအကြောင်းတွေ ပြောပြချင်ပါသေးတယ် . . . ။

ငါက ဆပ်ပြာပူဖောင်းကို ခိုစီးပြီး
မြင်းမိုရ်တောင်ကြီးနဲ့ တိုက်မိမှာ
စိုးရိမ်ရှာသူ မဟုတ်ခဲ့ . . .
ဒါပေမယ့် . . .
လေပွေလမ်းကြောင်းများမှာ
တုန်ဝါဖျော့အေး
“သစ္စာ”ကို ပဲ့တင်သံနဲ့ ပြန်ပေးနိုင်ခဲ့သူ . . . ။

ငါ့ကိုသတ် . . . ငါ့ရင်ဘတ်ကို ထိုးခွဲ ဖောက်လှန်ကြည့်
ငါ့လက်သီးထဲမှာ ကျစ်ကျစ်ပါအောင်ဆုပ်ထားတဲ့
သုညတစ်လုံးပဲ ရှိလိမ့်မယ် ။


ဝိုင်ယာကြိုးတွေ
“ထောင်း”ခနဲ မီးပွင့် ပြတ်တောက်ပြီး
ရုတ်ချည်း မှောင်အတိကျသွားတဲ့
“အန္ဓ”တို့ရဲ့ အိမ်အိုမှာ . . .
တေလေပီသစွာ . . . ငါနေတယ် ။

တိတ်ဆိတ် . . . ပြာလဲ့နေတဲ့ည
ရေတွင်းထဲ ခေါင်းငုံ့ပြီး
“ . . . ” ကို ချစ်တယ်လို့
ဘယ်ဆီဘယ်ဝယ် . . . ဟစ်အော်တမ်းတရတာ
ဘာကြောင့်ပါလဲ . . . ။

“အုံ့ပုန်းချစ်” သီချင်းကို
မဆိုချင်ပဲ ဆိုရတာ
ရွှေရည်စိမ်ထားတဲ့ လက်ပစ်ဗုံးကို
ကိုက်မျိုရသလိုပါပဲ . . . လို့
အက်ကွဲနေတဲ့ မယ်ဒလင်ကြီးက . . .
ငါ့ကို ပြောပြတယ် ။

အဲဒီလိုနဲ့ . . .
မိုးကိုဆန့်မြှောက်ထားတဲ့
မမိနိုင်သော ကမ်းလက်တွေဟာ
ဟိုး . . . အရင်တုန်းကလိုပဲ
ငါ့ဆီမှာ . . . မြေမှုန်တွေ စွန်းထင်းလျှက်ပါပဲလေ ။

လူဆိုတာ . . .
လင်းဝေစိမ်းမြနေတဲ့ ပန်းညများစွာထက်
သရဲခြောက်ရာ ညတစ်ညကို . . . ပိုသတိရတတ်တယ် . . . ။

ငါသေသွားခဲ့လို့ရှိရင်
ငါ့ရဲ့ သင်္ချိုင်းဂူမှာ
ကြက်ခြေခတ်တစ်ခုကိုသာ
မှတ်တိုင်အဖြစ် စိုက်ပေးထားပါ ။

တစ်ကယ်တော့ . . . အဲဒါဟာ
ငါသိသမျှ လောကဓမ္မကို
အကြွင်းမဲ့ ဖော်ပြသွားခြင်းပဲ ဖြစ်လိမ့်မယ် ။


ဟိုးငယ်ငယ် . . . ကျောင်းမပြေးတတ်ခင်တုန်းက
ခရေပွင့်ပြထားတဲ့ သင်္ချာတစ်ပုဒ်
ငါ့အပေါ် ခုန်အုပ်ပြီး
မင်နီတွေ ရဲခနဲ သုတ်သွားဖူးတယ် ။

ငါ . . . သတ္တိကောင်းကင်မှာ . . . နီလွင်ထစ်ချုန်း
တစ် . . .
နှစ် . . .
သုံး . . .
အနက်ရှိုင်းဆုံး ထိုးကျယ်ပစ်လိုက်တယ် . . . ။

ထူးလှတော့တယ်တော့လည်း မဟုတ်ပါဘူးလေ . . .
ကြောက်မက်ဖွယ်ရာလူတွေရဲ့
မဟာဘုတ်ဗေဒင်ထဲမှာမှ
ငါကလည်း “အဓိပတိဖွား” ဖြစ်ချင်ခဲ့တာကိုး . . . ။

မြောက်လေသွေးတိုင်း
မွှေးမြတဲ့ မျက်ရည်နံ့တွေ
လူငယ်တစ်ယောက်ရဲ့ လာရာလမ်းမှာ
ခုထက်ထိ သင်းပျံ.ဆွတ်ပေနေတယ်ဆိုတာ
ဘယ်သူကများ . . . မျှဝေခံစားခဲ့သလဲ . . . ။

အိမ်အပြန် ညများစွာမှာ
ဘယ်သူ့မှ မပြောချင်တဲ့စကားတွေ ပွေ့ပိုက်
ကိုယ့်ကိုယ်ကို . . . “လူမိုက်” လို့ ပြန်ခေါ်ခဲ့ရတယ် ။

၂၀၀၀ . . . ၂၀၀၆
ငါ့ကဗျာလေးတွေ ဆွေးမြည့်ကြေကွဲ
လမ်းဘေးအုတ်ခုံပေါ် လဲကျနေတယ် . . . ။

နှင်းမျှားတစ်လက်ရဲ့ အဆိပ်နဲ့
နိမိတ်မကောင်းတဲ့ ပုံပြင်
မမြင်ဘူးသော နေ့များ . . . ညများ
ပိတောက်ကိုင်းဖျားမှာ . . . ၀ပ်တွား စုရုံး
ငါ့ကို . . . ချည်ထုံးခဲ့တာ . . .
(ခု . . . အချိန်တိုင်အောင် . . . )
အလင်းစိမ်းတွေ ရစ်ဖွာလို့ . . . ။

မြို့ပြလမ်းတွေက တွေ့ခဲ့ဖူးတဲ့ ဂျစ်ပစီတွေလို
ဖြစ်ခဲ့သမျှကို . . .
ရယ်ကာမောကာ ပြန်ပြောနိုင်တဲ့အကျင့်လေး
သွေးအေးအေးနဲ့ ကြိုးစားနိုင်ခဲ့ပြီ . . .
. . . . . . . . . . . . . . . . . . . . .
. . . . . . . . . . . . . . . . . . . . .
. . . . . . . . . . . . . . . . . . . . .

ဘာပဲဖြစ်ဖြစ်
ကျောက်ခေတ်၊ ကြေးခေတ်
နျူကလီးယား ကင်ဆာ၊ အနာဂတ်ခေတ်
အားလုံးအတွက်
သေချာတဲ့ငါ . . . ကြေညာချက်ကတော့
နင့်ကို ထာဝရ ချစ်နေမယ်ဆိုတာပါပဲ ။

ထိပ်ထားရယ် . . .
ဖြစ်နိုင်မယ်ဆိုရင် . . .
ဂန္တ၀င် ပန်းပုရပိုဒ်မှာ . . .
နန်းသုံးအက္ခရာနဲ့ ခြယ်မှုန်း
နင့်နာမည်လေး စာသုံးလုံးကို
စီရီ သီကုံးပေးချင်တယ် . . . ။

နင့်အပေါ်ထားတဲ့ . . . ငါ့ရဲ့ ချစ်ခြင်းမေတ္တာဟာ
မိုးပေါ်ကို ဦးမော့ပြီး
ဝင်းပစွာ . . . လင်းမြတုန်ခါနေတဲ့ . . .
ရွှေဝါရောင် မီးတောက်မီးလျှံလိုပါပဲ . . . ။

ကျောင်းရှေ.က စံပယ်ရုံမှာ
ဗီးနပ်ရဲ့ နက္ခတ်တို့ တလက်လက် ပြာဝေမှုန်သင်း
ကျောင်းခန်းတွင်းမှာ . . .
လမင်းလေး သာခဲ့ဖူးတယ် . . . ။

ချစ်သော ကျောင်းသွားဖော်ရဲ့
ပန်းရုပ်လွှာကို မျှော်တွေးရင်း
ဆွေးလျညှိုးခွေ . . . ဖြေမပြေသူလေး အထ္ထုပတ္တိ
မြရာပင်ကြီး သိပါတယ် . . . ။

ကမ္ဘာဦးလူသားတို့လည်း (ဂူနံရံမှာ)
ငယ်ကျွမ်းမျက်နှာေ၀၀ါး
ပညာရှိကြီးများရယ် . . .
ပါဠိစာလုံးတွေနဲ့
ငါ့အပေါ် မဆုံးဖြတ်ပါနဲ့ဦး . . . ။

“ချစ်သူကိုတောင် ချစ်တယ် လို့ မပြောရဲတဲ့ကောင်
ရာစုတစ်ထောင်နေရစ်ခဲ့ . . . ထိုသို့ဖြင့် စကားမဲ့စေသတည်း ”
မြရာပင်ကြီးရဲ့
ညည်းတွားသဲ့သဲ့ သန်းခေါင်ယံ
ငှက်ဆိုးအုပ်နဲ့အတူ
ရုတ်တရက် လန့်ပျံသွားတယ် . . . ။

ချို့တဲ့သောဘ၀
ဆန္ဒရဲ့ မပြေလည်မှု
အနီရောင်မှတ်တမ်းတစ်ခုနဲ့
ချစ်သူ့အတွက် ပန်းသစ္စာ
ဪ . . . ငါ့ကိုလေ
နားလည်ပါ . . . နားလည်ပါ
နားလည်စမ်းပါ . . . ။

အဲဒီနေ့ရက်တွေမှာ မာရ်နတ်ရဲ့ ဘယ်ဘက်လက်က
အနက်ရောင် ကျမ်းချက်တစ်ပိုဒ်ဟာ
ငါ့ကို စီးနင်းတိုက်ခိုက်ဖို့
မြင်း ကကြိုးတို့ကို ပြင်လို့ “သ” လို့ နေခဲ့ပေါ့ ။

ဘာပဲပြောပြော
ရွှေနဲ့ စပ်ဝယ်လို့မရတဲ့
နောက်ဆုံးက လူတွေရဲ့ အတွေ့အကြုံမှာ
သံမှုန်တွေ ကပ်ပါနေလေရဲ့
ငါ . . . ဘာကိုမှ မကြောက်ခဲ့ဘူး ။

ဟောဒီလောကတောက်လျှောက်
ကျောက်သင်ပုန်းပေါ်က သုညနဲ့စာရင်
ဗလာစာအုပ်ပေါ်က သုညက မြတ်တယ်တဲ့
အဲဒီအော်သံကို ငါရယ်နေခဲ့တယ် . . . ။

မင်းကတော့ . . . ဘာလဲ လို့
အန္ဓတွေက ၀ိုင်းမေးတော့
၁ . . . ၂ . . . ၃ . . . ၄ . . . ၅ . . .
ငါ . . . အကုန်စဉ်းစားတယ် . . . ၆ . . . ၇ . . . ၈ . . . ၉ . . . ၀
တစ်ခုမှ မဟုတ်ဘူး . . . ငါ့အတွက် ဂဏန်းမရှိဘူး . . . ။

သွေးနဲ့ ယက်တဲ့ ကတ္တီပါစလို နီလွှရှင်းတောက်
ကြောက်ခမန်းလိလိ လှပတဲ့ နှလုံးသားဂီတသံစဉ်
နှင်းဆီဝိညာဉ်မှာ တင်တဲ့ကမ္ဗည်း
လကွယ်ညရောက်တိုင်း . . . ငါ ဂစ်တာတီးနေမယ် ။

ကျဆုံးတော့မယ့် စစ်သူရဲအိုက
ငယ်ဘ၀ကဓားနဲ့ ချစ်သူကို
ပြင်းရှစွာ သတိရလိုက်သလိုမျိုး
နင့်ကိုငါ သတိရနေတယ် . . . ။


ထိပ်ထားရေ . . .
ထိပ်ထားရေ . . .
ထိပ်ထားရေ . . .
သစ်ခုတ်သမားတွေမရှိတဲ့ တိုင်းပြည်မှာ
ငါ . . . လယ်သမားဖြစ်ချင်တယ်
နင် . . . ဘုရင်မ . . . လာမလုပ်ရဘူးနော် ။

တော်တော်ကြာ
တံစဉ်တစ်လက်ရဲ့ ကျင့်ဝတ်မှာ
သန်လျက်အတွက် ပန်းခူးခွင့်မပါလို့
ရွာဇနပုဒ်ရဲ့ မိုးရေထဲမှာ
ငါ . . . တစ်ယောက်တည်း
မျက်ရည်ဝဲနေရပါဦးမယ် . . . ။

ငါကလည်း ခက်တယ်
ကဗျာတစ်ပုဒ်နဲ့ နေမ၀င်အင်ပါယာ
ဘယ်ဟာယူမလဲလို့ မေးလာခဲ့ရင်
ဒုတိယအရာကို ငါ . . ငြင်းတယ် . . . ။

အဲဒီလိုနဲ့ပဲ
မှောက်ထားတဲ့ ငါ့ရဲ့ကံ့ကော်ရွက်ဖဲချပ်ကလေးတွေ
လောကကြီးကို အမျှဝေရင်း မြေမြိုခံခဲ့ရတာ . . .
ကာလများစွာ . . . ကြာပြီကောလေ . . . ။

တောင်ညိုမှာ ပြိုတဲ့မိုးတွေ
နင့်မျက်နှာလေးကို တိုးသက်တဲ့အခါ
တောင်ပင်လယ်က ဗေဒါတွေဟာ
ဆောက်တည်ရာမရ ဖြစ်ကုန်ကြတယ် . . . ။

ဟေး . . . ငါပြောမယ် . . .
အက်ဆစ်တိမ်ခိုး . . . တို့
မုတ်သုန်ကို နှိုးပါ
ဒီလူဆိုးအတွက်လည်း မိုးကြမ်းတို့ တစ်စက်စက်ရွာပါ . . . ။

မထိုက်တန်သူဆိုတာ လွင့်မျောရမှာပါပဲ . . .
ခွဲခွါခြင်းဟာ ခရမ်းပြာကျည်ဖူးကို
အဆိပ်ချိုတွေ လိမ်းသုတ်
နှလုံးသားတည့်တည့်ဆီ ချိန်ရွယ်မောင်းဖြုတ်လိုက်တယ် . . . ။

သက်ပြင်းဝေေ၀ခရေတို့ နှင်းစက်ဖားလျား
မျက်ရည်ကိုစားတဲ့ ချောက်ချားဖွယ်ရာ စကားမဲ့ည
ငါဟာ . . . ထက်ပိုင်းချိုးခံခဲ့ရတဲ့
တစ်ခြမ်းပဲ့ “လ”ပဲဖြစ်တယ် . . . ။

အိပ်မက်ထဲက ကမ္ဘာစစ်လို
အရိုးပြိုင်းပြိုင်းညနေအိုက
မြေကို ရှိခိုး . . .
မြူခိုးတို့ ပျောင်းအိညွတ်တွဲ
လူငယ်ဘ၀ရဲ့ ညရိပ်တို့ မှုန်ေ၀၀မ်းနည်းခဲ့ရတယ် ။

အခင်ဆုံးမဖြစ်ခဲ့ပေမယ့်
အခင်ဆုံးတွေအကြောင်းပြောတိုင်း
သတိရမိနေကျ သူငယ်ချင်းတစ်ယောက်ဆီ
ငါ . . . မရောက် ရောက်အောင်သွားမယ် . . . ။

ပြီးတော့
ခရိုခရိုင် လက်ဖက်ရည်ဆိုင်လေးမှာ
ကဗျာအကြောင်း စာအကြောင်းတွေပြောရင်း
ကိုယ့်ကိုယ်ကို . . . ပြန်လည်ဖန်ဆင်းပစ်မယ် . . . ကွယ် ။

အရက်သမားက
သူတစ်ပါးကို လွမ်းဆွတ်တာ ရယ်စရာမဟုတ်ပါဘူး
တစ်ရံတစ်ခါရဲ့ ပြန်မလာတဲ့သူကို သိကြဖို့ကောင်းတယ် . . . ။

လေညှင်းလေးရေ
ငါချစ်မြတ်နိုးရတဲ့ ကမ္ဘာရဲ့ထိပ်ထားကို
သူ့ဆံနွယ်လေးတွေ ဖွားခနဲ လွင့်ဝဲသွားရုံ
တစ်ချက်လောက် အုံ့သည်းတိုက်ခိုက်ပေးပါ . . . ။

လေစီးထဲမှာ ဖွာကြဲလှပနေရှာမယ့်
သူ့ရဲ့ကေသာဆံမြကို
အဝေးကနေ ရှိုက်မွှေးလွမ်းဆွတ်ပါရစေဦး . . . နော် . . . ။

အထီးကျန်တောင်ကို အုပ်စိုးဖို့
နတ်ပြည်က ရွာချတဲ့ ငါ့အတွက် . . .
အညတရမိုး . . . ရေ . . . နေပါစေတော့ ။

အဲဒီညဟာ
တစ်ခြမ်းပဲ့ “လ” က အသက်ပေးပြီး ကာကွယ်ခဲ့ရတဲ့
အလံမလဲမီ “ည” . . . ဖြစ်တယ် ။

ချစ်သူကို မြတ်နိုးရုံနဲ့
အရာရာကို လက်ဖြန့်မိုး စောင့်ရှောက်ချင်တဲ့ လူငယ်
ခု . . . ခြွင်းချက်နဲ့ လက်နက်ချလိုက်ပါတယ် . . .
. . . . . . . . . . . . . . . . . . . . .
. . . . . . . . . . . . . . . . . . . . .
. . . . . . . . . . . . . . . . . . . . .

တေလေဘ၀ရဲ့
ပထမဆုရအမှားတွေကို
လွယ်အိတ်ညိုထဲ ထည့်ပြီး
မီးအိမ် လက်ဆွဲ
ရာဇ၀င်ထဲမှာ ခရီးဆက်ရဦးမယ် ။

ထိပ်ထားရေ . . .
ကချေသည်တို့ရဲ့ တေးတွေနဲ့
ငြိမ်းအေးပျော်ရွှင် . . . ထာဝစဉ် ချမ်းမြေ.စေသား
ကောင်းသော မိုးသောက်ချိန်၌လည်း
ငြိမ်သက်တည်ကြည်စေ . . .
ငါ . . . ဆုတောင်းပေးနေမယ် . . . ။

ပန်းခူးရင်း . . .
သူငယ်ချင်းတွေနဲ့နေရင်း . . .
စကားပြောရင်း . . .
သီချင်းလေးတွေ ဆိုရင်း . . .
မင်း . . . ငါ့ကို . . . မေ့သွားမှာလား ? ။